【青春三十】
--
林海峰喺叱咤講過，三十歲係人生嘅一個里程碑。三十歲前，你彷彿仲可以裝作一個大細路，但三十歲後，青春就好似忽然間流走得好快，要麼就要把握時間捉住，要麼就任由佢悄悄流走。
--
2017年6月，我正式踏入呢個里程碑，而且不經不過就已經過咗一半。30歲之前，我遇過了好多人，無數次認識同疏遠，幾段感情由熱戀到分開，由小學嘅頒獎台，踏入了學生生涯中最長嘅中學時期，然後開始走入大學呢個小社會，身邊嘅朋友、家人、長輩都曾見證過我每個階段唔同嘅轉變。無人估到當初弱不禁風嗰個我，竟然會成為同輩之中少數會去追尋夢想嘅人。
--
不過講起追夢呢兩個字，我都有d唔好意思。喺澳洲帶返嚟嗰份雄心壯志，經過左時間嘅磨蝕、現實嘅摧殘，彷彿也逐點逐點慢慢咁流失。幾年前我話過，三十歲之前，我要去遊歷三十個國家，但係到咗而家，我仍然都仲差三個國家先完成到呢個目標，不過慶幸我嘅三十歲仲有半年，我仲有機會去完成我里程碑中嘅第一個mission。
--
至於背包浪子呢個page，近呢幾個月開始，我好似經營得越來越差，當然內容方面我都有責任嘅，所以新嘅一年我要應承自己用心搞返好呢度，去多d未去過嘅地方，寫多d新奇有趣嘅野俾大家睇！當然，亦都希望大家會多d支持同分享我d po，俾多d動力我。背包浪子呢個page就主力分享我既遊記同video，而相就可能會多d分享去我個ig:@autobackpack，大家可以follow埋我。
--
作為紀錄我踏入三十歲嘅呢個里程碑，我終於有完全屬於自己既第一首原創歌啦！由生日前有呢個idea，到搵朋友幫我作曲編曲，再自己填詞，然後錄音，再制作MV，都用左好一段時間。由細到大都想擁有自己既歌，多謝@aamusictravel作咗呢個曲俾我，亦多謝bosco義務幫我去編，同埋漏奶嘅幫手。作為二字頭嘅一個總結，我一路填一路好感觸，本身有諗過搵朋友幫我唱，但我覺得既然係自己既歌，即使錄完執完都仲係好難聽都好，都要自己唱返自有意義。當然，最多謝係Paddington幫我整咗幾晚通頂趕咗個MV出嚟，連我自己都不禁無限loop，loop返好多回憶出嚟。
--
我相信，2018，我的三字頭，一定會更精彩！多謝每個支持背包浪子嘅人，追夢，從來就唔容易，但你地絕對會令呢條路更加好行。
Search